Ministrja e Shëndetësisë dhe Mbrojtjes Sociale, Albana Koçiu mori pjesë në aktivitetin e organizuar në kuadër të Ditës Ndërkombëtare të Infermierëve gjatë së cilës u çel edhe ekspozita “Historia e Uniformave të Infermierit ndër shekuj”.

Fokusi i kësaj ekspozite ishte rrëfimi nëpërmjet fotografisë i të gjithë rrugëtimit të infermierisë shqiptare që nga fillesat e saj që përkojnë me themelimin e shtetit të pavarur shqiptar, duke prekur të tashmen dhe shkuar drejt së ardhmes.

Gjatë fjalës së saj, ministrja Koçiu theksoi se në 10-vjet të një reforme të thellë e të paprecedentë të sistemit tonë mjekësor, kryefjala ka qenë rikthimi i dinjitetit të profesionit për bluzat e bardha.

“Për shumë kohë, punonjësit e sektorit të shëndetësisë në Shqipëri kanë qenë të keqpaguar, e shpesh edhe të keqtrajtuar. Prandaj, jam krenare që gjatë këtyre 10 viteve të fundit kemi kryer një reformë të paprecedentë në sistemin shëndetësor ku kryefjala ka qenë gjithmonë rikthimi i dinjitetit të profesionit për të gjithë ju. Është punuar dhe po vijojmë të punojmë në mënyrë të vazhdueshme për të përmirësuar kushtet e punës. Në këtë periudhë, me dhjetëra spitale dhe mbi 400 qendra shëndetësore janë pajisur me një infrastrukturë bashkëkohore me pajisje të cilat ua lehtësojnë akoma më shumë punën dhe që bëjnë një qasje të re të trupës së sistemit të shëndetësisë”, deklaroi ajo.

Koçiu shtoi se “flasim shumë për standardet europiane, por jemi të vetëdijshëm se është e pamundur t’i ofrosh pacientit një standard të lartë trajtimi, nëse pikë së pari nuk ia ofron këtë standard vetë stafit që duhet të trajtojë këta pacientë”.

Më tej, ministrja u ndal edhe te punësimi nëpërmjet portalit Mjekë dhe Infermierë për Shqipërinë duke shtuar se “do të vijojmë të përmirësojmë hap pas hapi shpërblimin financiar dhe kushtet me të cilat ju punoni”.

“Pagat janë rritur mbi 70% dhe do të vijojnë të rriten. Është një angazhim i marrë nga Kryeministri Rama, nga qeveria shqiptare për t’i rritur me 100% deri në fund të këtij mandati. Përmes portalit janë mbi 5500 teknike të shkencave mjekësore të cilët janë rekrutuar dhe kanë filluar punë në sistemin tonë shëndetësor ku kryefjalë është meritokracia”, theksoi ajo.

Ministrja tha se “në korrik të këtij viti do të ketë një tjetër rritje për rreth 20 mijë infermierë prej 15 mijë lekë të reja dhe 20 mijë lekë të reja për mjekët e familjes”.

Ministrja u ndal edhe te një tjetër angazhim i ndërmarrë siç është ngritja e Mjekësisë Familjare, të cilat janë qendra që do të ofrojnë një shërbim me të gjitha specialitetet për qytetarët.

Sipas saj, infermierët pritet të kenë një rol shumë të rëndësishëm në mbarëvajtjen e këtyre qendrave.

“Dua të ndaj me ju projektin e Mjekësisë Familjare ku po punojmë për të hapur 10 të tilla deri në vitin 2025. Aktualisht kemi një qendër që po punojmë dhe do ta hapim shumë shpejt dhe është Qendra Shëndetësore Nr. 10 dhe pa diskutim infermierët kanë një rol të jashtëzakonshëm. E ndërkohë që jemi edhe në sezoni turistik, janë qendrat shëndetësore verore të cilat infermierët janë pika kyçe e shërbimit që do të ofrohet në qendrat shëndetësore, Këtë vit kemi 34 qendra shëndetësore verore të cilat do të hapen nga 1 qershori deri në 30 shtator”, përfundoi ministrja e Shëndetësisë dhe Mbrojtjes Sociale, Albana Koçiu.